2025-yilning 23-may kuni Toshkent tibbiyot akademiyasi Urganch filialida “Oʻzbekiston Respublikasida Patomorfologiyaning dolzarb muammolari” mavzusiga bagʻishlangan xalqaro ilmiy-amaliy anjuman tashkil etildi.

Ushbu tadbir Oʻzbekistonda patomorfologiya sohasi rivoji, ilmiy izlanishlar va zamonaviy tashxis usullarini joriy etish borasidagi dolzarb masalalarni muhokama qilish, shuningdek, xorijiy tajriba almashinuvini yoʻlga qoʻyish maqsadida o‘tkazildi.

Anjuman ochilish marosimida yurtimiz va xorijiy davlatlardan taniqli olimlar, mutaxassislar, tibbiyot oliy taʼlim muassasalari vakillari, rezidentlar va yosh tadqiqotchilar ishtirok etdi. Tadbir ishtirokchilarining fikricha, bu kabi anjumanlar soha rivojiga katta turtki beradi hamda tibbiy ta’lim sifatini oshirishda muhim oʻrin tutadi.

Ochilish marosimida Xorazm viloyati hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari S.K. Salayev so‘zga chiqdi. U viloyatda tibbiyot sohasini rivojlantirish bo‘yicha amalga oshirilayotgan chora-tadbirlar, shuningdek, yosh kadrlarni qoʻllab-quvvatlashga qaratilgan tashabbuslar haqida so‘z yuritdi.

Shuningdek, ochilish marosimida quyidagi nufuzli mehmonlar tabrik soʻzlari bilan ishtirok etdilar:

Professor V.A. Tsinzerling – Rossiyaning Sankt-Peterburg shahridagi V.A. Almazov nomidagi Milliy tibbiyot tadqiqot markazining Patomorfologiya ilmiy bo‘limi rahbari;
Professor A.M. Daurekhanov – Qozogʻistonning Xoja Ahmad Yassaviy nomidagi Xalqaro Qozogʻiston-Turkiya universiteti vakili;
Professor B.A. Magrupov – Tibbiyot xodimlarining kasbiy malakasini oshirish markazi, Menedjment, ijtimoiy va birlamchi sogʻliqni saqlash fakulteti dekani;
Professor N.A. Nishanov – Oʻzbekiston Respublikasi Patologik anatomiya markazi direktori;
Professor N.Y. Orlinskaya – Rossiyaning Nijniy Novgorod shahridagi Privoljsk tibbiyot ilmiy-tadqiqot universitetining Patologik anatomiya kafedrasi mudiri.

Anjumanning asosiy yoʻnalishlari Oʻzbekistonda Patomorfologiyaning dolzarb muammolari, Patologiyada zamonaviy tashxis usullaridan foydalanish, Morfologiyaning tibbiyotdagi roli, Janubiy orol boʻyi mintaqalaridagi patomorfologik xususiyatlari, Tibbiyotning turli masalalari borasida bo‘ldi.

Anjuman doirasida TTA Urganch filiali Patomorfologiya kafedrasi professori Yuldashev Bahrom Sobirjanovich – O‘zbekiston Respublikasi Maxpirat nomidagi O‘rta Osiyo Xalqlari tarixi instituti Turon fanlar akademiyasi tomonidan “Akademik” ilmiy unvoni bilan taqdirlandi. Shuningdek, u maxsus ko‘krak nishoni bilan ham mukofotlandi.

Ushbu yuksak e’tirof Yuldashev Bahrom Sobirjanovichning ilmiy faoliyati, O‘zbekiston tarixi, madaniyati va tibbiyot fanlariga qo‘shgan hissasi hamda patomorfologiya yo‘nalishida olib borgan izlanishlari uchun taqdim qilindi. Bu mukofot, nafaqat shaxsiy yutuq, balki yosh olimlar uchun namunaviy rag‘bat sifatida qadrlanadi.

Bu xalqaro darajadagi ilmiy platforma nafaqat yangi ilmiy qarashlar va innovatsion yondashuvlarni almashishga xizmat qildi, balki O‘zbekiston patomorfologiya sohasining jahon ilm-fan maydoniga integratsiyasini ta’minlashda muhim bosqich bo‘ldi.

Anjuman yakunida ishtirokchilar patomorfologiya sohasini yanada rivojlantirish, ilmiy-tadqiqot ishlari samaradorligini oshirish, xalqaro hamkorlikni kengaytirish va yosh mutaxassislarni qo‘llab-quvvatlash borasida taklif va tavsiyalar bilan chiqishdi.

TTA Urganch filiali Matbuot xizmati

Powered by Froala Editor

RЕABILITATSIYA: ZAMONAVIY YONDASHUVLAR, MUAMMOLAR, ISTIQBOLLAR