2022-yil 16-mart kuni Toshkent tibbiyot akademiyasi Urganch filialiga O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi boshlig‘i U.N. Tashkenboyev, Boshliqning ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi A.A. Nasirov, Ta’lim inspeksiyasi Xorazm viloyati hududiy bo‘limi boshlig‘i J.I. Baltayev tashrif buyurdi.

Tashrif davomida mehmonlar fiial direktori R.Y. Ruzibayev hamda Ta’lim sifatini nazorat qilish bo‘limi boshlig‘i M.I. Ollaberganov hamrohligida filialda o‘quv jarayonining tashkil etilishi va undagi muammolarni bartaraf etishga, ta’lim sifati va samaradorligini ta’minlashga qaratilgan kompleks chora-tadbirlarni amalga oshirilishiga doir qilinayotgan ishlar, shuningdek, Axborot resurs markazi va filial hududida joylashgan M-Shifo klinikasi faoliyati bilan yaqindan tanishib, talaba-yoshlar bilan muloqotda bo‘ldilar.

Muloqot jarayonida yoshlarning filialda olib borilayotgan ta’lim va amaliyot to‘g‘risidagi hamda ularning mustaqil izlanishlari uchun yaratilgan shart-sharoit va imkoniyatlar, dars faoliyati uchun zarur adabiyotlar mavjudligi va Moodle elektron platformasida taqdim qilinayotgan ma’lumotlar borasidagi fikr-mulohazalari bilan qiziqdilar.

Shundan so‘ng, kafedralardagi o‘quv xonalarini, “Pirogov” stoli, mulyajlar, trenajyor, fantomlar va boshqa zamonaviy tibbiy jihozlarni ko‘zdan kechirdilar.

Kuzatish va tahlillar natijasida aniqlangan kamchiliklarni bartaraf etish yuzasidan aniq chora-tadbirlar rejasi va yo‘l xaritalarini tuzish vazifasi belgilab olindi.

2022-yil 14-mart kuni Toshkent tibbiyot akademiyasi Urganch filiali va Yoshlar ishlar agentligi Xorazm viloyati boshqarmasi bilan hamkorlikda “Biologiya” fanidan “Yoshlar fan olimpiadasi” o‘tkazildi.

Ushbu loyiha muallifi filialning “Davolash ishi” yo‘nalishi 3-bosqich 306-C guruh talabasi Matchanov Bunyod Ozod o‘g‘li hisoblanadi. Olimpiadada filialga biriktirilgan Bog‘ot, Hazarasp, Tuproqqa’la, Urganch shahri va Xiva tumani mahallalaridagi uyushmagan yoshlar hamda filial Akademik litseyning 200 nafardan ziyod o‘quvchi-yoshlari qatnashdi.

Yakuniy natijalarga ko‘ra, 1-o‘rin sohibasi Xiva tumanidan Matchanova Sevara 88 ball to‘plab Diplom, medal, smart qo‘l soati bilan taqdirlandi. 2-o‘rin sohibasi TTA Urganch filiali litseyi o‘quvchisi Rajabova Intizor 86 ball bilan Diplom, medal, simsiz quloqchin bilan taqdirlandi. 3-o‘rin sohibi TTA Urganch filiali litseyi o‘quvchisi Ibragimov Ibrohimjon 77,5 ball bilan Diplom, medal, 150 ming so‘m pul mukofoti bilan taqdirlandi.

Mazkur loyiha mahallalardagi uyushmagan yoshlar va litsey o‘quvchilarini Biologiya faniga bo‘lgan qiziqishini oshirish, bilimda sog‘lom raqobatni yuzaga chiqarish, oliy ta’lim muassasalariga tayyorgarlik jarayonlarini yanada mustahkamlash, Biologiya fanining inson hayotidagi ro‘li va ahamiyatini yoshlar ongiga yanada chuqur singdirish, yurtimizdagi yoshlarni fan rivojiga o‘z hissalarini qo‘shishda ko‘maklashish maqsadida tashkil etildi.

2022-yil 9-mart sanasidan 12-mart sanasiga qadar TTA Urganch filiali direktori R.Y. Ruzibayev, Yoshlar masalalari va ma’naviy-ma’rifiy ishlar bo‘yicha direktor o‘rinbosari I.S. Yusupov va fakultet dekanlari ishtirokida kurslar kesimida alohida reja asosida uchrashuvlar tashkil etildi.

Uchrashuvlar davomida 2022-yil 4-mart kuni Prezidentimiz raisligida “oliy taʼlim muassasalari talabalari bandligini taʼminlash orqali ularning turmush darajasini yaxshilash” chora-tadbirlari yuzasidan videoselektor yig‘ilishidagi topshiriqlar ijrosini ta’minlash maqsadida talabalarni ishga jalb qilish, ularning ishga bo‘lgan ehtiyojini aniqlash va ish faoliyatini olib borayotgan yoshlarni qo‘llab-quvvatlash masalalalari ko‘rib chiqildi.

Shuningdek, videoselektor yig‘ilishida ko‘tarilgan masalalar mazmun-mohiyati keng ochib berilib, talabalarga tushuntirishlar berildi.

Toshkent tibbiyot akademiyasi Urganch filialida 2022-yil 11-mart kuni 15-mart – “Xalqaro iste’molchilar huquqlarini himoya qilish kuni” munosabati bilan “Moliyaviy savodxonlik” mavzusida o‘quv-seminar o‘tkazildi.

Tadbirda O‘zbekiston Respublikasi Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi va uning Xorazm viloyatidagi hududiy tuzilmasi rahbari H.Xayitboyev va bo‘lim bosho‘lig‘i T.Matyaqubov, filial Yoshlar masalalari va ma’naviy-ma’rifiy ishlar bo‘yicha direktor o‘rinbosari I.S. Yusupov, Yoshlar bilan ishlash, ma’naviyat va ma’rifat bo‘limi boshlig‘i M.I. Samandarov, bo‘lim uslubchilari G.S. Adambayeva, U.O. Karimov, Ma’naviy-ma’rifiy ishlar bo‘yicha dekan o‘rinbosarlari J.N. Jumaniyazov, E.N. Alimov, xotin-qizlar maslahat Kengashi raisi F.E. Atajanova hamda talaba-yoshlar ishtirok etishdi.

Tadbir davomida Xorazm viloyatidagi hududiy tuzilmasi rahbari H. Xayitboyev tomonidan talabalarga “Moliyaviy savodxonlik” mavzusida taqdimot materiallari atroflicha tanishtirildi hamda iste’molchilar huquqlarining davlat tomonidan himoya qilinishini ta’minlash yuzasidan hamda iste’molchilar huquqlarini himoya qilish agentligi tomonidan amalga oshirilayotgan ishlar, uning vakolatlari, iste’molchi va sotuvchi (ijrochi, ishlab chiqaruvchi)ning huquq va majburiyatlari haqida ma’lumot berildi.

Bunday tadbirlar “15-mart – Butunjahon iste’molchilar huquqlarini himoya qilish kuni”ni aholi va jamotchilik o‘rtasida keng nishonlash, bunda ayniqsa yoshlarning huquq va bilimlari hamda iste’molchilik madaniyatini yanada yuksaltirishga qaratilgan ma’rifiy ishlarni amalga oshirish maqsadida tashkil etilayotganligi bildirildi.

Tadbirda talabalarga huquqiy bilimdonlikni kuchaytirish, iste’molchilar huquqlarni himoya qilish, moliyaviy savodxonlik va moliyadan mas’uliyatli foydalanish, moliyaviy bilim va ko‘niklamalarini yuksaltirish, moliyadan to‘g‘ri va samarali foydalanishga oid bilimlar, tavsiyalar berildi.

Shuningdek, German Sparkassenstiftung for International Cooperation tashkiloti tomonidan tayyorlab, chop etilgan “Mening kundalik pullarimni rejalovchi kitobcham” va “Mening oilaviy byudjet kitobcham” qo‘llanmalari haqida o‘quvchilarga tegishli tushuntirish berildi. Mazkur kitobchadan jami 10 tasi filial kutubxonasi fondi uchun foydalanish va esdalik sovg‘asi sifatida taqdim etildi.

Tadbirda talaba-yoshlar o‘zlarini qiziqtirgan savollar bo‘yicha mutaxassislardan zarur javob va tavsiyalarga ega bo‘ldilar.

2022-yil 11-mart kuni TTA Urganch filialida 21-mart Navro‘z ayyomi kirib kelishi munosabati bilan “Davolash” fakulteti tyutorlari F.D. Radjapova,
I.A. Tangriyeva, X.D. Abdullayeva, X.A. Isokova, J.I. Sotiboldiyev, fakultet dekanining Xotin-qizlar masalalari bo‘yicha maslahatchisi D.Sh. Avazyazova tashabbusi bilan “Bahoriy milliy taomlar” ko‘rgazmasi tashkil etildi.

Ko‘rgazmada mamlakatimiz tarixi, xalqimizning urf-odatlarini o‘zida mujassam etgan milliy taomlar dasturxonga tortiq qilinib, o‘zbek xalqining rang-barang qadriyatlari, milliy libos va amaliy san’at namunalari namoyish etildi.

Filialda har yili an’anaviy tarzda tashkil etiladigan ushbu ko‘rgazma xorijlik talabalarga xalqimizning milliy qadriyatlari bilan yaqindan tanishish imkonini bermoqda.

Dasturxon ustidagi turli milliy taomlar va qizlarimiz egnidagi milliy liboslarimiz jilvasi barchaga birdek manzur bo’lib, bahoriy kayfiyat ulashdi.

2022-yil 9-mart kuni TTA Urganch filiali Yoshlar bilan ishlash, ma’naviyat va ma’rifat bo‘limi boshlig‘i M. Samandarov, Talabalarni turar joy bilan ta’minlash ishlarini muvofiqlashtirish bo‘limi boshlig‘i X.N. Xudayberganov, tyutorlar va Urganch shahri bo‘yicha IIO FMB XPB VE MB inspektor-psixologi, kapitan A.I. Raximov bilan birgalikda ijarada yashovchi talabalar holidan xabar olindi va ularni qiynayotgan muammolar o‘rganilib, keraklicha tavsiyalar berildi.

Shu bilan bir qatorda O‘zbekiston Respublikasi Prezidentining “Yoshlarning tadbirkorlik faoliyatini qo‘llab-quvvatlash va bandligiga ko‘maklashish, ularni ijtimoiy himoya qilish hamda bo‘sh vaqtini mazmunli tashkil etishga oid qo‘shimcha chora-tadbirlar to‘g‘risida”gi 2021-yil 20-apreldagi PF-6208-sonli Farmoni va O‘zbekiston Respublikasi Vazirlar Mahkamasining 2021-yil 24-sentabrdagi 605-sonli qarori yuzasidan tushuntirishlar berildi.

Motivatsion ruhda tashkil etilgan ushbu uchrashuv talabalarni birdek quvontirdi!

 2022-yil 9-mart sanasi Toshkent tibbiyot akademiyasi Urganch filialida fakultetlarning ma’naviy-ma’rifiy ishlar bo‘yicha dekan o‘rinbosarlari hamda tyutorlari uchun O‘zbekiston Respublikasi Oliy va o‘rta maxsus ta’lim vazirligining 2022-yil 24-yanvardagi “O‘zbekiston Respublikasi Prezidentining 2022-yil 19-yanvardagi PQ-92-son Qarori ijrosi to‘g‘risida”gi 30-sonli buyrug‘ining 2-ilovasida ko‘rsatilgan vazifalarni amalga oshirish yuzasidan seminar tashkil etildi.

 Seminarda Yoshlar masalalari va ma’naviy-ma’rifiy ishlar bo‘yicha direktor o‘rinbosari I.S. Yusupov, Yoshlar bilan ishlash, ma’naviyat va ma’rifat bo‘limi boshlig‘i M.I. Samandarov, bo‘lim uslubchilari U.O. Karimov, G.S. Adambayeva, Xotin-qizlar maslahat Kengashi raisi F.E. Atajanova, Psixolog D.Sh. Avazyazova, Ma’naviy-ma’rifiy ishlar bo‘yicha dekan o‘rinbosarlari J.N. Jumaniyazov, E.N. Alimov, D.Sh. Otajonov, A.R. Qurbanov va tyutorlar ishtirok etdi.

 Seminar davomida beshta muhim tashabbusni ilgari surish, talabalarni kitobxonlikka jalb etish, filialga biriktirilgan mahallalarning uyushmagan yoshlari bilan talabalar orasida “Zakovat” intellektual o‘yinlarini tashkil etish va talabalarni ish bilan ta’minlash masalalari ko‘rildi.

Mazkur masalalar yuzasidan mas’ullarga tegishli topshiriqlar berilib, belgilangan amaliy rejalardan ko‘zlangan maqsad mazmun-mohiyati chuqur ochib berildi.

2021-yilning 23-24-25 aprel kunlari Turkiyaning Antaliya shahrida o'tkazilgan “DOCTORS WORLD CUP OF FUTSAL TURKEY 2021” Jahon chempionatida O‘zbekiston shifokorlar terma jamoasi tarkibida TTA Urganch filiali “Akusherlik va ginekologiya” kafedrasi dosenti Jumaniyazov Qudrat Atabayevich ishtirok etib, O‘zbekiston sharafini himoya qildi. 

Jahon chempionatida o‘zbekistonlik yoshlar jamoasi 2-o‘rinni, yoshi 40 dan kattalar jamoasi 3-o‘rinni qo‘lga kiritdi. 

Eslatib o‘tamiz, shu kunga qadar 2017-yil Avstriya Respublikasining Leogang shahrida o‘tkazilgan Jahon chempionatida erishilgan 4-o‘rin eng yuqori natija sifatida e’tirof qilinayotgan edi.