2025-yil 15-noyabr kuni Urganch davlat tibbiyot institutida “Tibbiyotda yangi texnologiyalar va terapiya usullari” mavzusidagi VII Xalqaro ilmiy-amaliy anjuman o‘tkazildi.

Ushbu nufuzli ilmiy tadbirda tibbiyot sohasida amalga oshirilayotgan zamonaviy innovatsiyalar, ilg‘or terapiya usullari hamda ilmiy izlanishlarning eng dolzarb yo‘nalishlari atroflicha muhokama qilindi.

Anjumanda O‘zbekiston Qahramoni, O‘zbekiston Respublikasi Fanlar akademiyasi akademigi, professor Qurbanov Ravshan Davletovich, O‘zbekiston xususiy amaliyot shifokorlari assotsiatsiyasi raisi, professor Vaisov Adham Shavkatovich, Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi direktori, professor Sabirov Ulug‘bek Yusupxanovich, Toshkent davlat tibbiyot universiteti O‘quv ishlari bo‘yicha prorektori, professor Xaitov Qahramon Najmitdinovich, Toshkent davlat tibbiyot universiteti Dermatovenerologiya kafedrasi mudiri, professor Tashkenbayeva Umida Alisherovna hamda Urganch davlat tibbiyot instituti professori Abdullayev Ravshan Bobojanovich moderator sifatida ishtirok etishdi.

Anjumanni UrDTI professori Abdullayev Ravshan Bobojanovich ochib berib, tadbirning asosiy maqsadi — tibbiyotda yangi texnologiyalar va ilg‘or terapiya usullarini keng joriy etish, shuningdek, ilmiy tadqiqotlar natijalarini atroflicha muhokama qilish ekanligini ta’kidladi. Shundan so‘ng so‘z Xorazm viloyati hokimi o‘rinbosari San’atbek Salayevga berildi. U o‘z nutqida tibbiyotda innovatsion yondashuvlarni qo‘llab-quvvatlash, malakali kadrlar tayyorlashda davlat siyosatining ustuvor ahamiyatini alohida qayd etdi hamda anjumanning ilmiy va amaliy ahamiyatini e’tirof etdi.

Tadbir davomida bir qator taniqli olimlarga — professor Vaisov Adham Shavkatovich, professor Sabirov Ulug‘bek Yusufxanovich hamda akademik Qurbanov Ravshan Davletovichga Urganch davlat tibbiyot instituti Faxriy professori unvoni topshirildi.

Anjuman doirasida soha mutaxassislari tomonidan tibbiyotning dolzarb masalalari, innovatsion ilmiy yondashuvlar hamda mavjud muammolarning amaliy yechimlariga bag‘ishlangan ma’ruzalar taqdim etildi. Shuningdek, Zoom platformasi orqali xalqaro ishtirokchilar ham onlayn formatda o‘z ma’ruzalari bilan qatnashishdi.

Urganch davlat tibbiyot instituti Matbuot xizmati

Powered by Froala Editor

Anjumanlar to‘plami

Anjumanlar to‘plami